Маъмурий ишларни онлайн кўриш тартиби

Суд-ҳуқуқ соҳасидаги ислоҳотлар натижасида фуқароларнинг судга бўлган ишончи тобора ортиб бормоқда. Хусусан аҳолига судга мурожаат қилишда кўплаб қулайликлар яратилаётгани ҳам бунда муҳим ўрин тутмоқда. Соҳага ахборот технологиялари кенг тадбиқ этилмоқда. Одамларнинг судма-суд юришларига барҳам бериш, ортиқча оворагарчиликларнинг олдини олиш мақсадида жиноят ишлари бўйича Олтиариқ туман суди томонидан маъмурий ишларни онлайн тартибда кўриб чиқиш тартиби юзасидан туман профилактика инспекторлари иштирокида семинар бўлиб ўтди. Мазкур тартибнинг афзалликлари ва ўзига хос жиҳатлари бўйича маълумотлар берилди.

Фахрийлар ҳамиша эъзозда

Мустақилликнинг 30 йиллиги муносабати билан Фарғона вилояти суди раиси Ш.Камолов ҳамда вилоят, туманлараро, туман ва шаҳар судлари судьялари узоқ йиллар суд-ҳуқуқ тизимида фаолият юритиб, айни пайтда қарилик гаштини сураётган меҳнат фахрийлари ҳолидан хабар олинди.
– Ўз касбининг фидойиси бўлган меҳнат фахрийларимиз билан ҳар қанча фахрлансак арзийди, – дейди вилоят судининг жамоатчилик ва ОАВ билан алоқалар бўлими бош консультанти Қобилжон Муталиев.
– Улар ўз даврида касбига садоқат билан хизмат қилиб, қонун устуворлигини таъминлаш ва жиноятларнинг олдини олишга муносиб ҳисса қўшган. Шу боис ҳам меҳнат фахрийларимизни эъзозлаб, руҳан қувват бўлиш ҳамда бой тажрибаларидан сабоқ олиш уларнинг ишини давом эттираётган соҳа ходимлари учун шарафли бурчдир.
Мустақиллик байрами арафасида бўлиб ўтаётган бу каби учрашувлардан кўнгли тоғдек юксалаётган меҳнат фахрийлари Ватанимизга тинчлик, хонадонларга тўкинлик, ёшларга бахту иқбол тилаб, дуога қўл очмоқда.  
Шу билан бирга байрам тадбирига кела олмаган суд фахрийларининг яшаш хонадонларига бориб, ҳолидан хабар олинди.

Марғилон суди томонидан жазо ўтаётган 10 нафар маҳкумлар жазодан озод қилинди

Жиноят ишлари бўйича Марғилон шаҳар судининг раиси М.Марахимов томонидан 2021 йил 19 июль куни Марғилон шаҳридаги “Милтиқсоз” маҳалла фуқаролар йиғинида сайёр суд мажлиси ўтказилиб, Марғилон шаҳар Пробация бўлимининг жазо ўтаётган 10 нафар маҳкумларига нисбатан киритган тақдимномалар мазмунан кўриб чиқилиб,  Ўзбекистон Республикаси ЖКнинг 73-моддасига асосан маҳкумлар жазони ўташдан муддатидан илгари шартли равишда озод қилинди.

Фарғона вилоятида фуқароларнинг суд-ҳуқуқ соҳасидаги оммавий қабуллар бошланди

Фарғона вилоятида фуқароларнинг суд-ҳуқуқ соҳасидаги мурожаатларига самарали ечим топиш учун янада қулай шароит яратиш мақсадида Ўзбекистон Республикаси Президенти Администрацияси, Президент Халқ қабулхоналари, Олий суд, Судьялар олий кенгаши, Бош прокуратура, Ички ишлар вазирлиги, Адлия вазирлиги ҳамда Давлат божхона қўмитаси раҳбар ходимлари иштирокида оммавий қабуллар бошланди.

Жараёнга Ўзбекистон Республикаси Олий суди раиси ўринбосари Х. Тўрахўжаев раҳбарлик қилмоқда.

Айни пайтда Марғилон, Фарғона, Қувасой шаҳарлари ҳамда Тошлоқ ва Фарғона туманлари аҳолиси Марғилон шаҳрида қабул қилиниб, фуқароларнинг соҳага оид мурожаат ва муаммолари ўрганилмоқда.

Эртага оммавий қабул Ёзёвон ва Боғдод туманларида давом эттирилиб, унда Ёзёвон, Қува, Қўштепа, Олтиариқ, Боғдод, Риштон, Бувайда, Учкўприк ва Сўх туманлари аҳолиси мурожаатлари ўрганилади.

Фарғонада Ўзбекистон Республикаси Олий суди, АҚШнинг Халқаро тараққиёт агентлиги (USAID) ва БМТ Тараққиёт Дастурининг “Ўзбекистонда қонун устуворлиги йўлида ҳамкорлик” қўшма лойиҳаси доирасида судлар фаолиятини ёритиш масалалари бўйича маҳаллий журналист ва блогерлар учун ўқув семинар-тренинг ташкил этилди

Унда иштирокчиларга Олий суд Жамоатчилик ва оммавий ахборот воситалари билан алоқалар бошқармаси ходимлари томонидан суд муҳокамаси ошкоралиги, судлар фаолиятига доир ахборот олиш ҳуқуқининг амалга оширилиши, шунингдек, судлар томонидан мазкур масалага оид қонун ҳужжатлари бир хилда қўлланилишини таъминлаш мақсадида қабул қилинган Ўзбекистон Республикаси Олий суди Пленумининг 2020 йил 21 февралдаги куни “Суд муҳокамаси ошкоралигини ва судлар фаолиятига доир ахборот олиш ҳуқуқини таъминлаш тўғрисида”ги Қарорининг мазмун-моҳияти батафсил тушунтирилди.

Шунингдек, семинар-тренинг давомида малакали тренерлар суд органларининг оммавий ахборот воситалари ва жамоатчилик билан ўзаро ҳамкорлигининг ҳуқуқий асослари, ахборот тарқатишда шахснинг шаъни ва қадр-қимматини ҳимоя қилиш, жавобгарлик масалалари ҳамда суд ишларига доир материалларни тайёрлашнинг муҳим жиҳатлари тўғрисида атрофлича маълумот беришди.

Ўқув машғулоти сўнгида Фарғона вилояти судлари раислари билан журналист ва блогерлар ўртасида очиқ мулоқот ўтказилиб, томонлар ўзаро фикр алмашдилар ва оммавий ахборот воситалари вакиллари ўзларини қизиқтирган саволларга жавоблар олдилар.

Skip to content