ҲОФИЗНИ ТУНАГАН ЎҒРИ

Қува тумани халқи илгаридан санъатга кўнгил қўйган, айниқса қўшиқчиликка эътибор катта. Буни тумандан кўплаб машҳур хонанда ва созандалар етишиб чиққани ҳам тасдиқлайди. Илхомжон Искандаров ҳам ёш хонандалардан, консерваторияни тамомлаб созандалар гуруҳини ташкил этиб, одамларнинг тўй-томошаларида хизмат қилиб келмоқда.

2021 йил 26 июль куни Акбаробод қишлоғида бўлган никоҳ тўйида ҳофиз И.Искандаров бошчилигидаги гуруҳ хизматда бўлди, шўх куй-қўшиқлар ёшларни, барча меҳмонларни шод этди. Бундан хурсанд бўлганлар ҳофизга, созандаларга пуллар қистиришди, пулнинг “чўғи” баландлигидан ҳофизга яна илҳом келди, ёшларга ёқар қўшиқларни куйлаб тўйга файз киритди.Тўйга меҳмон бўлиб келган М.Қурбонов ҳам ҳофизга қойил қолди ва унга пул қистира туриб, мусиқа асбоби ғилофида турган пулларни кўрди ва фикри бузилди. Бир неча миллион пуллар шундай сўри устида турибди, ҳофиз-у созандалар фақат даврага файз улашиш билан овора. М.Қурбонов атрофга олазарак қаради-да, санъаткорлар пулини “туя қилди”.

Бир муддат овозга дам бериш баҳонасида тўхтаган ҳофиз, ғилофнинг қуруқлигини кўрди ва овози бўғилди, пул дегани фақат жигардан эмас, балки ўпкага ҳам дахлдор экан. Тўйхонада дарров шовқин кўтарилди, биров шу куни кўп ичган мастлардан гумонласа, бошқаси қуда томондан ташриф буюрганлардан пулни сўроқлади. Аммо, тўй оқшомини видеотасвирга тушираётган йигит ўз касбининг ҳақиқий устаси экан. Видеоёзувдан ким нима егани-ю, ким қанча қистирганигача тасвирланибди. Унда М.Қурбоновнинг санъаткорлар сафига қўшилиб тургани, сўнг пайт пойлаб сўрига қўл чўзиб, бир нима олгани-ю ва шу заҳоти шошилиб ташқарига чиқиб кетгани кўриниб қолди. Тўйга меҳмонга эмас, хизматга чақирилган профилактика инспектори ҳам “иссиқ из”дан бориб М.Қурбоновни ушлади. Ўғри ҳам йўқолиб қолмаслиги учун олиб қўйган 3,5 млн. сўмни ҳофизга қайтарди ҳатто дарҳол кетидан ИИБ ходимини юборгани учун ҳофиздан ҳам “ўпкалашни” унутмади.

Ҳа, санъаткор халқи кўнгилчан, одамшаванда бўлади экан, И.Искандаров ҳам судда М.Қурбоновни кечирганини айтиб, ишни ярашув билан тугатишни сўради. Ўз навбатида М.Қурбонов ҳам қилмишига иқрор бўлиб, ярашувга асосан уни озод этишни илтимос қилди ва жиноят иши юритувдан тугатилди. Зеро, М.Қурбонов юқоридагилардан тўғри хулоса чиқариб, тарбияланган бўлса шунинг ўзи катта гап.

 

И.Искандаров эса тўйларда меҳмонларга шодлик улашиб, тўйхонага файз киритиб юрибди, тушаётган пулларга энди ҳушёр, ишончли жойга жойлашни созандаларга тайинлаган. Тўйхона – муродхона дейишади, бундай муқаддас жойда ўзганинг мулкига кўз олайтириш оғир гуноҳ аммо маънавияти паст, нафсига қул кимсалар орамизда бор экан, айтар сўзимиз шу, тўйхонада эҳтиёт бўлинг, меҳмонларни ўғри қилманг.

 

Зафаржон Омонов, жиноят ишлари бўйича Қува тумани суди раиси

Сайлов ва ёшлар

Фарғона вилоят судининг раиси Камолов Шуҳрат Маратович жорий йилнинг
13 октябрь куни Фарғона вилояти юридик техникуми ўқувчилари билан “Суд-ҳуқуқ тизимидаги ислоҳотлар” мавзусида давра суҳбати ўтказилди.

Вилоят судининг раиси Ш.Камолов суҳбат давомида суд-ҳуқуқ тизимидаги ўзгаришлар, ислоҳотлар, бир суд бир инстация тамойилини мазмун-моҳияти, ҳозирги кундаги фаолияти ҳақида тўхталиб, бугунги кунда мамлакатимизда сиёсий жараён 24-октябрь куни бўлиб ўтадиган Ўзбекистон Республикаси Президенти сайлови ҳақида мазмунли тушунчаларни баён қилиб, техникум ўқувчилари томонидан берилган саволларга атрофлича жавоб бериб ўтди.

СУДЬЯЛАР ЎРТА МАКТАБДА ДАВРА СУҲБАТИ ЎТКАЗИШДИ

Жиноят ишлари бўйича Қува тумани судининг ташаббуси билан Қува туманидаги 66-сонли мактаб биносида «Сайлов қонунчилиги, сайлов соҳасидаги ўзгаришлар ҳамда Ўзбекистон Республикаси Президенти сайловининг ўзига хос хусусиятлари» ва «Вояга етмаганлар ўртасида жиноятчиликнинг ҳуқуқий таҳлили» мавзуларида давра суҳбати ташкил этилди. Унда ўрта мактаб ўқитувчилари, ўқувчи ёшлар ва уларнинг ота-оналари иштирок этишди.

        Тадбир давомида йиғилиш иштирокчиларига кун тартибида қайд этилган масалалар юзасидан атрофлича маълумотлар бериб ўтилди.

       Шунингдек, суд раиси З.Омонов ва судья Қ.Абдуллаевлар томонидан шахсий қабул амалга оширилиб, унда нафақат мактаб ўқувчилари мактаб ўқитувчиларини хизмат ҳамда хизматдан ташқари вақтида юзага келётган муаммолари юзасидан, балки уларнинг шахсий ва оилавий масалаларга оид мурожаатлари ҳам тингланди ва ҳуқуқий тушунтириш берилди.

        Давра суҳбатида ўқитувчилар, ўқувчи ёшлар ва уларнинг ота-оналари мавзулар бўйича суд ходимларига ўзларининг қизиқтирган саволлари билан мурожаат этишди ва уларга батафсил жавоблар олишди.

      Тадбир сўнгида иштирокчилар келгусида ҳам ушбу турдаги ҳуқуқий-профилактик тадбирларни мунтазам равишда ўтказишга келишиб олдилар.

Тил тўғрисидаги қоидаларга амал қилган ҳолда суд ҳужжатлари матнини тайёрлаш даркор

Фарғона вилоят судида суд ҳужжатлари матнини тайёрлашда давлат тили тўғрисидаги қоидаларга қатъий риоя этилишини таъминлаш борасида вилоят судьялари ва суд аппарати ходимлари иштирокида ўқув-семинар ташкил этилди. Семинарда суд қарори қатъийлиги, уни ижросини таъминлашда тушунмовчиликларнинг олдини олиш мақсадида ҳар бир гап аниқ ва равшан ёзилган бўлиши, қолаверса, маълум бир мақсадни кўзлаб ишлатилиши таъкидланди. Шунингдек, ҳужжат матни расмий муносабатларни ифодалаши ҳисобга олиниб, матнда бадиий тасвир воситаси, турли сўз ўйинлари, кучли ҳиссий бўёқдор сўзларнинг қўлланилишига йўл қўймаслик лозимлиги, матндаги ахборот холис акс эттирилган бўлиши кераклиги айтиб ўтилди. Айниқса, суд қарорлари ва суд мажлиси баённомасини сифатли ёзилишида эътибор қаратиш лозим бўлган жиҳатларга алоҳида тўхталиб ўтилди.

СУДЬЯЛАР ФАОЛИЯТИ ОЧИҚ ВА ШАФФОФ ЭЛЕКТРОН РЕЙТИНГ ДАСТУРИ АСОСИДА БАҲОЛАНАДИ

“Ўзбекистон Республикаси Судьялар олий кенгаши тўғрисида”ги Ўзбекистон Республикаси Қонунига ўзгартиш ва қўшимчалар киритиш ҳақида”ги Қонун Президент томонидан имзоланди.

Қонунга киритилган ўзгартиришларга кўра, Кенгаш:

➖ судьялар орасида коррупция ҳолатларининг олдини олиб, уларни барвақт аниқлаш бўйича чора-тадбирлар кўради;

➖ суд тизимида аниқланган ҳар бир коррупция ҳолатини кўриб чиқади ва принципиал баҳолайди.

 

Шунингдек, киритилган ўзгартиришларга кўра, Кенгаш судьялар фаолиятини очиқ ва шаффоф электрон рейтинг дастури асосида баҳолаш мезонларини аниқлаш бўйича чора-тадбирлар кўради.

 

Қонун билан Кенгаш раиси ўринбосари ваколатларига ўзгартиришлар киритилди. Унга кўра, Кенгаш раиси ўринбосари:

Судьялар дахлсизлигини таъминлаш ва коррупциянинг олдини олиш бўйича суд инспекциясининг фаолиятига раҳбарликни амалга оширади, унинг фаолияти самарадорлигини таъминлаш учун жавобгар бўлади;

ахборот-коммуникация технологияларини жорий этишга, шунингдек ахборот хавфсизлигини таъминлашга доир ишларни ташкил этади.

 

Қонунга киритилган қўшимчаларга кўра, Кенгаш раиси судьяларнинг дахлсизлигини бузганлик ва одил судловни амалга оширишга аралашганлик ҳолатлари юзасидан прокуратура органларига тақдимнома киритиши мумкин.

Прокуратура органларига киритилган тақдимнома 1 ой муддатда кўриб чиқилади ва Кенгаш жиноят иши қўзғатилганлиги тўғрисида ёки уни қўзғатиш рад этилганлиги ҳақида Бош прокуратура томонидан хабардор қилинади.

 

Достонбек Холматов,

Фарғона вилоят судлари судьялари малака ҳайъатининг котиби

Skip to content