Иш бўйича жабрланганларга етказилган моддий зарарнинг қопланиши фирибгарлик жинояти учун озодликдан маҳрум этилган маҳкумнинг жазони ижро этиш муассасасидан озод этилишига сабаб бўлди.
Элдор Мирзаев (исм-шарифи ўзгартирилган) таниши Музаффар Абдуллаев ва Хуршид Амановлардан 2-3 маротаба насияга чорва ҳайвонларни сотиб олиб, пулини ўз вақтида бериш орқали уларнинг ишончига кириб олади. Шу тариқа Элдор Мирзаев 26 бош қўй ва 5 бош қора молларни 92.000.000 сўмга сотиб олиб, пулини бир ой муддатда беришини айтиб уларни алдаб, чорва ҳайвонларини бошқа шахсларга сотиб юбориб фирибгарлик жиноятини содир қилиб, жиноят ишлари бўйича Қўштепа туман судининг 2020 йил 24 декабрдаги ҳукми билан Ўзбекистон Республикаси Жиноят Кодексининг 168-моддаси 3-қисми “а” банди билан 5 йил муддатга озодликдан маҳрум қилиш жазосига судланган.
Элдор Мирзаев қилган ишидан пушаймонлигини, жабрланувчиларга етказилган зарарни тўлиқ қоплаганлигини, бошқа фуқароларни алдамаслигини айтиб судга апелляция тартибида шикоят тақдим қилади.
Натижада Фарғона вилоят суди жиноят ишлари бўйича судлов ҳайъатида, 2021 йилнинг 22 июнь куни суд раиси Ш.Камоловнинг раислигида Элдор Мирзаевга оид жиноят ишини апелляция инстанциясида кўриб чиқиб, Ўзбекистон Республикаси Жиноят Кодексининг 168-моддаси 5-қисми (етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди) талабига амал қилиб, Э.Мирзаевга нисбатан чиқарилган суд ҳукмини моддий зарар қопланганлиги муносабати билан ўзгартириб, унга тайинланган Жиноят Кодексининг 168-моддаси 3-қисми “а” банди билан 5 йил озодликдан маҳрум қилиш жазосини 3 йил ахлоқ тузатиш ишлари жазосига ўзгартириб, уни жазони ижро этиш муассасасидан қамоқдан озод қилади.
Хулоса ўрнида шуни айтиш жоизки ўзгаларни ишончига кириб, уларни алдаб, фирибгарлик қилишнинг оқибати суд курсисига олиб келганидан тўғри хулоса чиқариш керак. Ризқни ҳалол топган одам ҳеч қачон жиноятга қўл урмайди.
Акрамжон Мамасидиков, Фарғона вилоят судининг судья катта ёрдамчиси