Уйнинг пулини тўлиқ олиб уни эгасига расмийлаштирмай алдаб юрган фирибгарга суд ҳукми ўқилди
Қўқон шаҳрида яшовчи, эндигина 30 ёшга кирган Рашид Умматов (исм-шарифлари ўзгартирилган) 2021 йилнинг январь ойида уй-жой савдоси билан шуғулланувчи фуқаро Ҳалимжон Мамадалиевга қарзлари кўпайиб кетгани сабабли ўзи истиқомат қилаётган уйни сотишини айтади.
— Харидорлар бўлса, мени учраштиринг, — дейди у маклер танишига.
Шунга биноан Ҳ.Мамадалиев ўзининг ишдаги ҳамкори Элмурод Ўрмоновга ўша уйни олишни тавсия қилади. Бинобарин, Э.Ўрмонов уйни кўриш учун Рашидникига боради ва у билан учрашиб, уйнинг нархини сўрайди. Натижада иккаласи баҳолашиб, 15.500 АҚШ долларига олди-сотди қилишга келишишади. Келишув ишонарли бўлиши учун эса харидор олдиндан 1000 АҚШ доллари беради.
Эртаси куни Р.Умматов ўн кун ичида уйни унинг номига расмийлаштириб беришни ваъда қилиб, қолган пулни ҳам беришини сўрайди.
Элмурод ўзи ишонган ҳамкори Ҳалимжон ўртага тушгани боис Рашидга қолган 14.500 АҚШ долларини ҳам санаб беради. Аммо пул берганлигини тасдиқловчи тилхат ёки бошқа бирор ҳужжат талаб қилмайди. Уй эгаси бўлса турли баҳоналарни рўкач қилиб, олди-сотдини орқага сураверади.
Мана шу тариқа орадан 6 ой ўтса-да, Рашиднинг важ-карсонлари тугамайди. Шу боис Э.Ўрмонов ундан пулини қайтаришни талаб қилади. Бироқ ёлғончи йигит пулларни қарзларига бериб юборганини айтади. Ана шу суҳбатдан кейин ҳам яна бир йил вақт ўтади. Бу муддатда Р.Умматов на уйни харидорнинг номига расмийлаштириб беради, на пулини қайтаради. Шундагина Элмурод алданганини англаб етади. Натижада у ҳуқуқни муҳофаза қилувчи идораларга мурожаат қилади.
Рашид Умматов айбига тўлиқ иқрор бўлади. Бинобарин, унга нисбатан жиноят иши қўзғатилади. Тергов жараёнида у жабрланувчига етказилган моддий зарарни тўлиқ қоплайди. Шу боис Жиноят ишлари бўйича Қўқон шаҳар суди унга озодликдан маҳрум қилиш билан боғлиқ бўлмаган жазо тайинлади. Яъни судланувчини Жиноят кодексининг 168-моддаси 4-қисми “а” банди билан айбдор деб топиб, қонуний жазога маҳкум этди.
Биз бежизга Р.Умматовни кўзи очилмаган фирибгар, дея атамадик. Негаки у аввал ҳам фирибгарликка қўл ургани боис жиноят ишлари бўйича Қўқон шаҳар судининг 2022 йил 7 февралдаги ҳукмига биноан Жиноят кодексининг 168-моддаси 3-қисми “б” банди билан айбли деб топилиб, 5 йил муддатга озодликдан маҳрум қилинади. Аммо Фарғона вилоят судининг 2022 йил 31 мартдаги ажрими асосида ҳукм ўзгартирилади. Яъни унга тайинланган жазо Жиноят кодексининг 62-моддаси тартибида иш ҳақининг 20 фоизини давлат даромадига ушлаб қолган ҳолда 1 йил 3 ой 27 кун ахлоқ тузатиш ишлари жазосига алмаштирилган. Бироқ ҳали ахлоқ тузатиш иши жазосини ўтамасидан олдин Рашиднинг юқоридаги фирибгарлиги фош бўлди. Бинобарин, суд ана шу ўталмаган жазони ҳам инобатга олган ҳолда ҳукм чиқарди.
Хуршид ҚОСИМОВ,
жиноят ишлари бўйича
Қўқон шаҳар суди раиси