СУДЛАР ФАОЛИЯТИГА ҲАР ҚАНДАЙ АРАЛАШИШ ОДИЛ СУДЛОВГА СОЯ СОЛИШ, ДЕБ БАҲОЛАНАДИ

Президентимиз Шавкат Мирзиёев раислигида жорий йилнинг 5 март куни Коррупцияга қарши курашиш бўйича миллий кенгашнинг кенгайтирилган йиғилиши бўлиб ўтди.

Ушбу йиғилишда коррупциянинг олдини олиш бўйича амалга оширилган ишлар, эришилган натижалар ва келгусидаги устувор вазифалар муҳокама қилинди.

Жумладан, давлатимиз раҳбари суд тизимида коррупциявий хавф-хатарларнинг олдини олиш, одил судлов сифати ва самарадорлигини ошириш доимо диққат марказида бўлишини таъкидлаб, сўнгги йилларда судлар мустақиллигини таъминлаш бўйича катта ислоҳотлар амалга оширилгани, лекин судьяларни мажлисга чақириш, уларга ваколатига кирмайдиган ваъзифаларни юклаш ҳолатлари ҳам учраб тургани қайд этилди.

Шунингдек, айрим идоралар томонидан судга таъсир ўтказишга уринишлар ҳали-ҳануз давом этаётгани кўрсатиб ўтилди.

“Барча раҳбарларни қатъий огоҳлантираман. Судлар фаолиятига ҳар қандай аралашиш одил судловга соя солиш, деб баҳоланади. Бу бўйича сўров ҳам, жавобгарлик ҳам қаттиқ бўлади”, – деди Президентимиз.

Судьяларнинг дахлсизлиги, мустақиллиги янгиланган Конституциямиз ва қонунларимиз билан мустаҳкамланган.

Хусусан, Ўзбекистон Республикаси Конституциясининг 136-моддасида, судьялар мустақил ва дахлсиз эканлиги, муайян ишлар бўйича ҳисобдор бўлмаслиги, фақат Конституция ва қонунга бўйсуниши, судьяларнинг одил судловни амалга оширишга доир фаолиятига ҳар қандай тарзда аралашишга йўл қўйилмаслиги ва бундай аралашиш қонунга мувофиқ жавобгарликка сабаб бўлиши кўрсатилган.

Жиноят кодексининг 236-моддасига кўра, тергов қилишга ёки суд ишларини ҳал этишга аралашиш, яъни ишни ҳар томонлама, тўла ва холисона ўрганилишига тўсқинлик қилиш мақсадида суриштирувчи, терговчи ёки прокурорга ёхуд адолатсиз ҳукм, ҳал қилув қарори, ажрим ёки қарор чиқарилишига эришиш мақсадида судьяга турли шаклда қонунга хилоф равишда таъсир ўтказиш учун айбдор жиноий жавобгарликка тортилади.

Шу сабабли, судья ўз касбий фаолиятини амалга оширишида ҳар қандай ташқи таъсирларнинг олдини олиши, унга таъсир ўтказилганлиги тўғрисида хулоса чиқаришга йўл қўядиган ҳамда судьянинг мустақиллиги ва холислигига шубҳа туғдириши мумкин бўлган бирон-бир ҳаракатларни содир этмаслиги ёки бошқа шахсларга шундай ҳаракатларни содир этиши учун имкон яратиб бермаслиги, таҳдидлар, босим ва ғайриқонуний таъсир ўтказишга, суд жараёнига бевосита ёки билвосита аралашишга қаршилик кўрсатиши шарт.

Ҳурматли Президентимиз Шавкат Мирзиёев таъкидлаганларидек, судьянинг онгида – адолат, тилида – ҳақиқат, дилида – поклик бўлиши, суд остонасига қадам қўйган ҳар бир инсон Ўзбекистонда адолат ҳукм сураётганига тўла ишонч ҳосил қилиши керак.

Вахобжон Сиддиков,
Фарғона вилоят судлари
судьялари малака ҳайъати раиси

Фарғона вилоят судида тергов судьялари учун қонун нормаларини тўғри қўллаш ҳамда амалиётни бирхиллаштиришни таъминлаш, амалиётда юзага келаётган муаммоларга ечимлар бериш мақсадида семинар ташкил этилди

Фарғона вилоят судида тергов судьялари учун қонун нормаларини тўғри қўллаш ҳамда амалиётни бирхиллаштиришни таъминлаш, амалиётда юзага келаётган муаммоларга ечимлар бериш мақсадида семинар ташкил этилди

 

Семинарда Ўзбекистон Республикаси Олий суди судьяси, “Тараққиёт стратегияси” маркази масъул ходими ҳамда Фарғона вилоят судида фаолият юритаётган тергов судьялари бевосита, Андижон ва Наманган вилоятларида фаолият юритаётган тергов судьялари видеоконференцалоқа режимида иштирок этди.

 

Тадбирда тергов судьясининг ваколатларига киритилган қамоққа олиш ёки уй қамоғи тарзидаги эҳтиёт чорасини қўллаш, қамоқда сақлаш ёки уй қамоғи муддатини узайтириш, ушлаб туриш муддатини қирқ саккиз соатгача узайтириш, паспортнинг (ҳаракатланиш ҳужжатининг) амал қилишини тўхтатиб туриш, айбланувчини лавозимидан четлаштириш, шахсни тиббий муассасага жойлаштириш, айбланувчининг тиббий муассасада бўлиши муддатини узайтириш, мурдани эксгумация қилиш, почта-телеграф жўнатмаларини хатлаш, прокурорнинг гувоҳ ва жабрланувчининг (фуқаровий даъвогарнинг) кўрсатувларини олдиндан мустаҳкамлаш, тинтув ўтказиш, телефонлар ва бошқа телекоммуникация қурилмалари орқали олиб бориладиган сўзлашувларни эшитиб туриш, улар орқали узатиладиган ахборотни олиш, мол-мулкни хатлаш тўғрисидаги илтимосномаларни кўриб чиқиш юзасидан тушунтиришлар берилиб, фикр алмашилди.

 

Шунингдек, семинар қатнашчилари ўртасида жонли савол-жавоб бўлиб ўтди. Иштирокчилар ўзларини қизиқтирган саволларга батафсил жавоб олди.

 

Сарвар Турғунбоев,
Фарғона вилоят суди бош консультанти

Фарғона вилоят судида 8-март – Халқаро хотин қизлар куни муносабати билан байрам тадбири ташкил этилди

Видеоконференцалоқа режимида ўтказилган тадбирда вилоят, туманлараро, туман ва шаҳар судларининг судья ва ходимлари ҳамда суд фахрийлари иштирок этди.

Маълумки, дунёда ҳар бир давлат ва жамиятнинг нуфузи ҳамда маданий даражаси энг аввало хотин-қизларга бўлган муносабат, уларга кўрсатилаётган ҳурмат-эҳтиром билан белгиланади. Бинобарин, аёлларни улуғлаб, уларга ҳурмат-эҳтиром кўрсатиб яшайдиган халқ ўзининг юксак маданияти ва олийжаноб қадриятларини амалда намоён қиладиган миллат сифатида ҳурмат қозонади.

Бугунги кунда Ўзбекистонда амалга оширилаётган суд-ҳуқуқ ислоҳотлари жараёнида хотин-қизларнинг ўрни муҳимдир.

8-март – Халқаро хотин қизлар ҳамда 10-март – Халқаро аёл судьялар куни билан Олий суд раисининг тегишли буйруғи асосида суд фахрийси Нуринисахон Абидова “Бенуқсон хизматлари учун” кўкрак нишони, вилоят суди судьяси Мавлудахон Умматова Олий суднинг фахрий ёрлиғи билан;

шунингдек, Судьялар олий кенгаши раисининг буйруғи билан вилоят суди судьяси Ферузахон Сиддиқова Судьялар олий кенгашининг фахрий ёрлиғи билан тақдирланди.

Тадбирда сўзга чиққанлар суд тизимида фаолият олиб бораётган хотин-қизларнинг ўрни ва уларнинг самарали меҳнатларини алоҳида эътироф этиб, гўзаллик ва нафосат байрами муносабати билан уларга самимий тилаклар билдиришди.

Суд фахриялари, аёл судьялар ва ходима аёллар эсдалик совғалари билан тақдирланди.

Сарвар Турғунбоев,
Фарғона вилоят суди бош консультанти

Skip to content